10-njy oktýabrda paýtagtymyzyň «Laçyn» seýilgähinde Gazak şahyry we akyldary Abaý Kunanbaýewiň ýadygärliginiň açylyş dabarasy geçirildi. Dabara türkmen halkynyň Milli Lideri Gurbanguly Berdimuhamedow we Gazagystanyň Prezidenti Kasym-Jomart Tokaýew gatnaşdy. Şeýle-de iki ýurduň medeniýet we sungat işgärleri, habar beriş serişdeleriniň wekilleri hem gatnaşdy.

   Dabaranyň dowamynda iki ýurduň medeniýet işgärleriniň türkmen we gazak dillerinde aýdym-sazly çykyşlary belentden ýaňlandy.

   Abaý ýadygärliginiň açylmagy diňe bir waka bolman, eýsem, beýik şahyryň we akyldaryň mirasyna uly hormat goýulýandygynyň aýdyň subutnamasydyr. Bu ýadygärlik ýaş nesilleri döredijilige we bilime ruhlandyrýan ruhy baýlygyň we pelsepe mirasynyň nyşanyna öwrülip, şeýle hem halklaryň arasyndaky dostdoganlygy has-da jebisleşdirýär.