«Pähim-paýhas ummany Magtymguly Pyragy» ýylynda türkmeniň beýik ogly dana şahyryň 300 ýyllygynyň dabaraly bellenilýän günleri taryhy wakalara beslenýär. Ýaňy-ýakynda paýtagtymyzyň günorta böleginde hormatly Prezidentimiz Serdar Berdimuhamedowyň gatnaşmagynda Magtymguly Pyragynyň ýadygärliginiň hem-de «Magtymguly Pyragy» medeni-seýilgäh toplumynyň аçylyş dabarasy geçirildi. Döwlet Baştutanymyz we dabaranyň myhmanlary Magtymguly Pyragynyň ýadygärliginiň etegine gül desselerini goýdular.

Tebigy belentlikde gurlan ýadygärligiň beýikligi 60 metre, beýik akyldaryň «Türkmeniň» goşgusyndan hem-de Gahryman Arkadagymyzyň «Pähim-paýhas ummany Magtymguly Pyragy» atly şygryndan setirler ýazylan binýadyň beýikligi bolsa 25 metre deňdir. Dürli ýurtlaryň meşhur nusgawy şahyrlaryň, dünýä belli akyldarlaryň heýkellerini bir ýere jemleýän seýilgäh toplumyň binagärliginiň täsin bölegini emele getirýär. Bu bolsa dost-doganlygy, halklaryň hoşniýetli gatnaşyklaryny ündän dana şahyryň ruhuna hormatdyr. Dabaranyň ahyrynda yşyklar, aýdym-saz bilen utgaşdyrylan dronlaryň şüweleňi guraldy. Ajaýyp feýerwerk bolsa agşamky asmany täsin şekiller bilen bezäp, dabarada ýatdan çykmajak pursat döretdi.